உ.பி:அஜ்மீர் தர்காவுக்கு சென்ற பஸ் மீது லாரி மோதல் – 8 யாத்ரீகர்கள் பலி!

புதுடெல்லி:உத்தரபிரதேச மாநிலத்தில் இருந்து அஜ்மீர் நோக்கிச் சென்றுகொண்டிருந்த பஸ் மீது லாரி மோதி விபத்து ஏற்பட்டது. இதில் 8 யாத்ரீகர்கள் பலியானார்கள். 44 பேர் காயமடைந்து மருத்துவமனையில் சிகிட்சைக்காக அனுமதிக்கப்பட்டுள்ளனர்.

கோத்வாலி தேஹத் என்கிற இடத்தில் இந்த விபத்து வெள்ளிக்கிழமை நடந்தது. அம்பேத் நகரில் இருந்து ஆஜ்மீர் தர்கா நோக்கிச் சென்று கொண்டிருந்த பஸ் கோன்டா – பெஹ்ராய்ச் நெடுஞ்சாலையில் சென்று கொண்டிருந்தபோது எதிரே வந்த லாரி மீது நேருக்கு நேர் மோதிக் கொண்டதாக போலீஸார் தெரிவித்தனர்.

வேகமாக மோதிக் கொண்டதால், பஸ் தீப்பிடித்து எரிந்தது. 54 இருக்கைகள் கொண்ட இந்த பஸ்ஸில் 60 முதல் 70 பேர் பயணம் செய்ததாகவும், அதில் 44 பேர் மீட்கப்பட்டிருப்பதாகவும் அதிகாரிகள் தெரிவித்தனர். விபத்து நடந்ததும் சிலர் பஸ்ஸிலிருந்து குதித்து தப்பிவிட்டதாகத் தெரிகிறது. கேஸ் வெல்டிங் இயந்திரங்கள் உதவியுடன் மீட்புப்பணிகள் நடந்தன.