முஸ்லிம்களுக்கு எதிராக காட்சிகள் அமைத்திருந்ததாக சர்ச்சை எழுந்த துப்பாக்கி படத்திலிருந்து சர்ச்சைக்குரிய காட்சிகள் நீக்கப்பட்டதா என்பது குறித்து விளக்கம் அளிக்க சென்னை உயர் நீதிமன்றம் தமிழக அரசுக்கு உத்தரவு பிறப்பித்துள்ளது. சென்னை திருவல்லிக்கேணி பகுதியை சேர்ந்த இந்திய முஸ்லிம் லீக் கட்சி பொதுச்செயலாளர் அப்துல் ரகீம் சென்னை உயர் நீதிமன்றத்தில் மனு ஒன்று தாக்கல் செய்தார். அதில், "நடிகர் விஜய் நடித்த துப்பாக்கி படத்தை கலைப்புலி தாணு தயாரித்துள்ளார். இந்த படத்தில் முஸ்லிம் இளைஞர்களை பற்றி அவதூறான காட்சிகள் இடம் பெற்றுள்ளது. இந்த படத்தை பார்த்ததும் முஸ்லிம்கள் அதிர்ச்சி அடைந்தனர். எனவே முஸ்லிம்கள் பற்றிய காட்சிகளை நீக்க வேண்டும் என்று கோரி அரசுக்கு மனு கொடுத்தேன். இதுவரை எந்த நடவடிக்கையும் எடுக்கவில்லை. இந்த படத்திற்கு யு சான்றிதழ் கொடுத்துள்ளனர். இது தவறானது. இந்த சான்றிதழை வாபஸ் பெற தணிக்கை குழுவுக்கு உத்தரவிட வேண்டும்." என்று கோரியிருந்தார்.
இந்த மனு நீதிபதிகள் பானுமதி, சசிதரன் ஆகியோர் முன்னிலையில் விசாரணைக்கு வந்தது. தமிழக அரசு சார்பாக அரசு சிறப்பு வழக்கறிஞர் இன்பதுரை ஆஜராகி வாதாடினார். அவர் தனது வாதத்தில்,
"துப்பாக்கி படம் வெளியானதும், முஸ்லிம்கள் படத்தில் உள்ள சில காட்சிகளை நீக்க கோரி போராட்டம் நடத்தினர். முதல்வர் ஜெயலலிதாவிடம் கோரிக்கை வைத்தனர். உடனே முதல்வர் தலையிட்டு சம்பந்தப்பட்டவர்களிடம் பேசி அந்த காட்சிகளை நீக்க நடவடிக்கை எடுத்தார். இதற்கு முஸ்லிம்கள் நன்றி தெரிவித்தனர். எனவே இந்த வழக்கை தள்ளுபடி செய்ய வேண்டும்" என்று கோரினார்.
அரசு வழக்கறிஞரின் வாதத்தைக் கேட்ட நீதிபதிகள், "படத்தில் சர்ச்சைக்குரிய காட்சிகள் நீக்கப்பட்டதா என்பது குறித்து ஜனவரி 3ம் தேதி அரசு பதில் அளிக்க வேண்டும்" என்று கூறி, இது தொடர்பாக அரசுக்கு நோட்டீஸ் அனுப்ப உத்தரவிட்டனர்.
கருத்துகள் இல்லை:
கருத்துரையிடுக