டெல்லி: ஊழல் மற்றும் கருப்புப் பணத்திற்கு எதிராக டெல்லியில் நடந்த செய்தியாளர்கள் கூட்டத்தில் யோகா குரு பாபா ராம்தேவ் முகத்தில் கருப்பு மை தெளிக்கப்பட்டது. யோகா குரு பாபா ராம்தேவ் ஊழல் மற்றும் கருப்புப் பணத்திற்கு எதிராக இன்று டெல்லியில் உள்ள கான்ஸ்டிடியூஷனல் கிளப்பில் செய்தியாளர்களை சந்தித்து பேசினார். அப்போது கூட்டத்தில் இருந்த ஒருவர் ராம்தேவின் முகத்தில் கருப்பு மையை தெளித்தார். இதனால் அங்கு பெரும் பரபரப்பு ஏற்பட்டது. இதையடுத்து ராம்தேவின் ஆதரவாளர்கள் அந்த நபரைப் பிடித்து நையப் புடைத்தனர். இதில் அவரது வாயில் இருந்து ரத்தம் சொட்டியது.
இது குறித்து ராம்தேவ் கூறியதாவது,
நான் என்ன செய்தேன்? எதற்காக இப்படி செய்கிறார்கள்? எப்பொழுதுமே உண்மைக்காக போராடுபவர்கள் அதற்கான விலையைக் கொடுத்துத் தான் தீர வேண்டும். வெளிநாடுகளில் பதுக்கி வைக்கப்பட்டுள்ள கருப்புப் பணத்தை இந்தியாவுக்கு கொண்டு வரச் சொல்லி போராடினால் முகத்தில் கருப்பு மை தெளிக்கிறார்கள். இதனால் எல்லாம் நான் அசரமாட்டேன். என்ன நடந்தாலும் சரி தொடர்ந்து போராடுவேன் என்றார்.
கருத்துகள் இல்லை:
கருத்துரையிடுக