பாக்தாத்தில் 4 கார் குண்டுவெடிப்பு சம்பவங்கள்-14 பேர் பலி, 76 பேர் காயம்

பாக்தாத்: பாக்தாத்தில் இன்று நடந்த 4 கார் குண்டுவெடிப்பு சம்பவங்களில், 14 பேர் பலியாகினர். 76க்கும் மேற்பட்டோர் காயம் அடைந்தனர். ஈராக் தலைநகர் பாக்தாத்தின் கிழக்கே உள்ள சிட்டே மாவட்டத்தை சேர்ந்த பகுதியில் இன்று 2 கார் வெடிகுண்டு வெடிப்பு சம்பவங்கள் நடந்தன. சதர் நகரத்தில் தொழிலாளர்கள் கூடும் முக்கிய இடத்தில் இன்று அதிகாலையில் முதல் கார் குண்டு வெடித்தது. இதில் 8 பேர் பலியாகினர். மேலும் 21 பேர் காயம் அடைந்தனர்.

சில நிமிடங்களுக்கு பிறகு அதே மாவட்டத்தின் இன்னொரு பகுதியில் வெடிகுண்டு ஏற்றி வந்த கார் ஒன்று வெடித்து சிதறியது. இதில் 3 பேர் பலியாகினர், 26 பேர் காயம் அடைந்தனர்.

அதன்பிறகு ஷூலா பகுதியில் உள்ள உயர்நிலை பள்ளி அருகே காலை 10.30 மணிக்கு வெடிகுண்டு நிரப்பப்பட்டு நிறுத்தப்பட்டிருந்த கார் ஒன்று வெடித்து சிதறியது. இதில் 2 பள்ளி மாணவர்கள் பலியாகினர். மேலும் 16 மாணவர்கள் காயமடைந்ததாக போலீசார் தெரிவித்தனர்.

அதேபோல ஹூரியா மாவட்டத்தில் உள்ள பரபரப்பான வியாபார பகுதியில் நிறுத்தப்பட்டிருந்த வெடிகுண்டு நிரப்பப்பட்டிருந்த கார் வெடித்து சிதறியது. இதில் ஒருவர் பலியானார். 13 பேர் காயம் அடைந்தனர்.