மார்கழி மாதக் குளிரில் எம் மத்தியில் மீண்டும் சூடு பிடித்துள்ள செய்தி பள்ளிவாசல்கள் உடைக்கப்படுகின்றன, முஸ்லிம்களின் இருப்புக்கு அச்சுறுத்தல்கள் விடுக்கப்படுகின்றது என்பதாகும். தம்புள்ளையில் ஆரம்பித்து தற்போது வரை சுமார் 30 பள்ளிவாசல்கள் சிங்கள- பௌத்த இனவாதிகளின் தாக்குதல்களுக்கு இரையாகியுள்ளன.
அண்மையில் தெகிவளை பிரதேசத்தில் அமைந்துள்ள மூன்று பள்ளிவாசல்களில் தொழுகை மற்றும் இதர மார்க்க நடவடிக்கைகளை நிறுத்திக் கொள்ளுமாறு பொலிசாரின் கட்டளை பிறப்பிக்கப்பட்டிருந்தது. எனினும் அப்பள்ளிவாசல்களின் நிருவாகத்தினர் அதற்கு ஒருபோதும் செவி சாய்க்கவில்லை. இதன் காரணமாக இம்மாதம் 15ம் திகதியன்று நிருவாகத்தினரை அழைத்த கொஹுவெல பொலிஸ் நிலைய பொறுப்பதிகாரி பள்ளிவாசலில் தொழுகை நடவடிக்கைகளை உடனடியாக நிறுத்துமாறும், அவ்வாறு நிறுத்தாத பட்சத்தில் ஏற்படும் விளைவுகளுக்கு நாம் பொறுப்பல்ல எனவும் எச்சரிக்கை விடுத்திருந்தார்.
பள்ளிவாசல்களில் சிங்கள- பௌத்த இனவாதிகளினால் மேற்கொள்ளப்பட்டு வரு கின்ற இவ்வாறான பிரச்சினைகளுக்கு எல் லாம் பின்புலமாக காணப்படுவது 2008 ஆம் ஆண்டில் புத்த சாசன திணைக்களத்தினால் (அமைச்சினால்) வெளியிடப்பட்டுள்ள சுற்று நிருபமாகும். அதன் ஏற்பாடுகளின் பிரகாரம் 2008.10.16 திகதிக்கு பின்பு பதிவு செய்யப்பட்டு இயங்குகின்ற நாடு பூராகவும் உள்ள சுமார் 389 பள்ளிவாசல்கள் இத்தகைய அச்சுறுத்தல்களுக்கு உள்ளாகும் நிலைமைகள் காணப்படுகின்றன.
எனவே, பள்ளிவாசல்களுக்கு எதிரான சிங்கள- பௌத்த இவாதிகளின் செயற்பாடுகள் குறிப்பிட்ட ஓரிரு பள்ளிவாசல்களுடன் முற்றுப் பெறக்கூடிய ஒன்றல்ல. மாறாக, நாடு பூராகவும் வாழ்கிகின்ற முஸ்லிம்களுக்கும் அவர்களுடைய பள்ளிவாசல்களுக்கும் எதிரான இனவாத நடவடிக்கையின் ஆரம்பமே இதுவாகும்.
இதுவரை காலமும் தாக்குதலுக்கு அல்லது அச்சுறுத்தல்களுக்கு உள்ளாக்கப்பட்டு வந்த பள்ளிவாசல்கள் அனைத்திற்கும் காரணம் இதுவே என்பதனை மக்கள் புரிந்து வைத்திருக்க வேண்டும்.
சுமார் ஒன்றரை வருடங்களுக்கு முன்பதாக, ராஜகிரிய ஒபயசேகரபுரவில் உள்ள பள்ளிவாசலுக்கும் இதே முறையினையே இந்த சிங்கள -பௌத்த பேரினவாதிகள் மேற்கொண்டிருந்தனர். அன்றும் புத்தசாசன அமைச்சின் செயலாளர் பள்ளிவாசலின் நடவடிக்கையினை நிறுத்துமாறு பள்ளிவாசலுக்கு அனுப்பிய கடிதத்தின் பிரதி முஸ்லிம் காலச்சார பண்பாட்டு அலுவல்கள் திணைக்களத்திற்கும், மற்றொரு பிரதி பொலிசாருக்கும் அனுப்பப்பட்டிருந்தது. இதே நிலைமையே பின்பு கிராண்ட் பாஸ் பள்ளிவாசலிலும் நடந்தேறியது என்பதுடன் இன்று தெஹிவளையிலும் பரீட்சிப்பு நடவடிக்கை மேற்கொள்ளப்படுகின்றன.
புத்தசாசன அமைச்சில் பேச்சுவார்த்தை
இம்மாதம் 18 ஆம் திகதியன்று, குறித்த பள்ளிவாசல்களின் நம்பிக்கையாளர் சபை உறுப்பினர்கள் கொஹுவல பொலிஸ் நிலைய பொறுப்பதிகாரியினால் புத்தசாசன அமைச்சில் பேச்சுவார்த்தைக்கு அழைக்கப்பட்டிருந்தனர். எனினும் பள்ளிவாசல்களின் நிருவகத்தினர் தொடர்ந்தும் அவ்வாறான கூட்டத்தில் பங்குபற்றுவதில்லை எனக் கூறி நிராகரித்துவிட்டனர்.
இந் நிராகரிப்பின் பின்னணியில் பல நியாயங்கள் இருந்தன. புத்தசாசன அமைச்சில் ஏற்பாடு செய்யப்பட்ட கூட்டத்தில் பங்குபற்றுவதானது தமக்கு நாட்டின் சட்டத்தினால் வழங்கப்பட்டுள்ள உரிமையினை தாமாகவே நிராகரித்து கொள்வதாய் அமையும். பள்ளிவாசல்கள் தொடர்பில் ஏற்படுகின்ற பிரச்சினைக்கு புத்தசான அமைச்சில் தீர்வு காண்பது என்பது புத்தசாசன அமைச்சினையும் அதன் செயலாளரினையும் பள்ளிவாசல்களின் நிருவாக நடவடிக்கைகள் குறித்த அலுவலக உயர் அதிகாரிகளாக ஏற்றுக் கொள்வதாகவும், அவர்களுடைய அநீதியான போக்கினை நாம் மதிப்பதாகவுமே அமையும். மேலும், கடந்த காலங்களில் அழைப்பை மதித்து அவ்வாறான பேச்சுவார்த்தைக்கு சென்ற பள்ளிவாசல்களின் நம்பிக்கையாளர் சபையினருக்கு தமது நிலைப்பாட்டினை அச்சபையில் எடுத்துக் கூறுவதற்கு எதுவித அவகாசமும் வழங்கப்பட்டிருக்கவில்லை என்பது அனுபவம். அங்கு முஸ்லிம் அமைச்சர்களும், ஏனைய முஸ்லிம் சமூக பிரதிநிதிகளும் இரண்டாம் தரமாகவே நடாத்தப்பட்டிருந்தனர்.
பேச்சுவார்த்தையில் பங்குபற்றாததன் விளைவு
குறித்த பள்ளிவாசல்களின் நிருவாகத்தினர் கொஹுவல பொலிஸ் நிலைய பொறுப்பதிகாரி தனது அதிகாரத்தினை துஷ்பிரயோகம் செய்வதாகவும், எதுவித அடிப்படையும் இன்றி குறித்த பள்ளிவாசல்களில் தொழுகையினை நிறுத்துமாறு கூறுவதாகவும் கருதி கொழும்பு பொலிஸ் தலைமையகத்தில் உடனடியாக அப் பொறுப்பதிகாரிக்கு எதிராக முறைப்பாடு ஒன்றினை மேற்கொண்டிருந்தனர்.
இதன் காரணமாக, அன்றிரவு சுமார் 11.30 மணியளவில் கடவத்தை வீதியிலுள்ள மஸ்ஜிதுல் ஷாபி பள்ளிவாசலுக்கு பேரினவாத கும்பலினால் சேதம் ஏற்படுத்தப்பட்டிருந்தது. இதன்போது குறித்த பள்ளிவாசல் நிருவகத்தினர் தொலைபேசி மூலம் பொலிசாருக்கு இதுபற்றி அறிவித்த போதும் பொலிசார் குறித்த இடத்திற்கு வருகை தரவில்லை. பொலிசார் அவற்றை தூர நின்று வேடிக்கை பார்த்துக் கொண்டிருந்தனர் என்ற செய்தியும் இல்லாமலில்லை. இதனால் பாதுகாப்பு அமைச்சுக்கு மேற்கொண்ட உடனடி முறைப்பாட்டின் பேரில் இராணுவத்தினர் அவ்விடத்திற்கு வருகை தந்து நிலைமையை கட்டுப்பாட்டிற்குள் கொண்டு வந்தனர். பின்னர் பள்ளிவாசலுக்கு இராணுவ பாதுகாப்பும் அன்றிரவு வழங்கப்பட்டிருந்தது.
சுற்று நிருபத்தின் சூழ்ச்சி
பள்ளிவாசல்கள் தொடர்பில் புத்தசாசன அமைச்சு தனது பௌத்த கொள்கைக்கு மாறான நாடகத்தினை அரங்கேற்ற காரணமாகவும், ஏற்கனவே அது பள்ளிவாசல்கள் மீது அரங்கேற்றியிருக்கின்ற இனவாத நாடகங்களுக்கும் பின்புலமாக காணப்படுவதும் அதன் 2008 ஆம் ஆண்டு வெளியிடப்பட்ட சுற்று நிருபமாகும். இச்சுற்று நிருபமானது நாட்டில் உள்ள விகாரைகள், கோவில்கள், தேவாலயங்கள் மற்றும் பள்ளிவாசல்கள் என்பவற்றின் எண்ணிக்கையினை கட்டுப்படுத்தவும், அவற்றை ஒழுங்குபடுத்தவும் எனக் கூறி புத்தசாசன அமைச்சின் செயலாளரினால் வெளியிடப்பட்டுள்ளது.
இச்சுற்று நிருப ஏற்பாடுகளின் கீழ், வணக்கத்தலங்கள் எதுவும் அமைக்கப்படுவதாக இருப்பின் அவை குறித்த சமய அலுவல்கள் திணைக்களத்தின் அனுமதியைப் பெற்றுக்கொள்ள முன்பதாக, குறித்த வணக்க வழிபாட்டிடம் அமைந்திருக் கும் பிரதேசத்தின் உள்ளூராட்சி அதிகார சபையிடம் இருந்து அனுமதியைப் பெற்றுக்கொள்ள வேண்டும். அவ்வாறு உள்ளூராட்சி அதிகார சபை தான் அனுமதி வழங்க முன்பதாக குறித்த வணக்க வழிபாட்டிடம் அமையவிருக்கும் பிரதேசத்திலுள்ள பிரதேச செயலக மற்றும் கிராம சேவகரினதும், ஏனைய மதங்களைச் சேர்ந்த வணக்கஸ்தலங்கள் அங்கு இருப்பின் அவற்றினுடைய அனுமதியினையும் பெற்றுக் கொள்ள வேண்டும் என கூறுகின்றது. அதாவது, குறித்த பிரதேசத்தில் காணப்படுகின்ற ஏனைய மத வழிபாட்டிடங்கள் (குறிப்பாக விகாரை-, விகாராதிபதி) அதற்கு தமது ஆட்சேபனையை தெரிவிக்கின்ற போது குறித்த வணக்கத்தலத்தினை அமைத்துக் கொள்ள முடியாது.
சுற்று நிருபத்தினை ஏற்றுக் கொள்ள முயாதது ஏன்?
தற்போது இந்த சுற்று நிருபத்தின் சூழ்ச்சி முஸ்லிம் மக்களை குறிவைத்து சுற்றி வந்தாலும், அதன் தாக்கம் எதிர்காலத்தில் நாட்டில் உள்ள ஏனைய சிறுபான்மையிரையும் மெல்ல இறுக நசுக்கும் என்பதில் சந்தேகம் கிடையாது. எனவே, இச்சுற்று நிருபத்தின் ஏற்பாடுகளின் பிரகாரம் நீங்கள் தற்போது கோவில், தேவாலயம் அல்லது பள்ளிவாசல் ஒன்றினை நிர்மாணிக்க வேண்டுமாக இருந்தால் அருகிலுள்ள விகாரையிலிருந்து அல்லது பிற வணக்கஸ்தலங்களில் இருந்து உங்கள் வணக்கஸ்தலத்திற்கு எதிராக எதுவித ஆட்சேபனையும் தெரிவிக்கப்படக் கூடாது. சுருங்கக் கூறுவதானால், நீங்கள் உங்களுக்கென வணக்கஸ்தலம் ஒன்றினை நிர்மாணிப்பதாக இருந்தால் அதனை தீர்மானிக்க வேண்டியது நீங்கள் அல்ல மாறாக உங்கள் பிரதேசத்தில் அமைந்திருக்கும் விகாரையும் அதன் தலைமைப் பிக்குவும்தான்.
மேலும், இச்சுற்று நிருபம் வெளியிடப்பட்டதன் பின்னர் சுமார் 389 பள்ளிவாசல்கள் நாடு பூராகவும் வக்பு சபையின் கீழ் பதியப்பட்டுள்ளன என்பது குறிப்பிடத்தக்கது. எனவே, தற்போது தெகிவளை பிரதேசத்தில் உள்ள இப்பள்ளிவாசல்களுக்கு ஏற்பட்டுள்ள பிரச்சினை என்பது நிச்சயமாக தெகிவளையை சுற்றி வாழும் முஸ்லிம்களின் பிரச்சினை மட்டுமல்ல. எதிர்காலத்தில் நாட்டில் உள்ள ஏனைய பள்ளிவாசல்களுக்கும் இதே பரிதாப நிலைமைதான் காத்திருக்கிறது என்பது உறுதி.
புத்தசாசனவினால் வெளியிடப்பட்டுள்ள இச்சுற்று நிருபமானது நாட்டின் அரசியலமைப்பின் உறுப்புரை 10 மற்றும் 14 என்பவற்றை விஞ்ச முடியாது என்பதுடன் நாட்டின் ஏனைய சட்டங்களையும் குறிப்பாக வக்பு சட்டத்தினையும் விஞ்ச முடியாது. அரசியலமைப்பின் உறுப்புரை 10 சட்டத்தின் முன் யாவரும் சமம் எனவும், சட்டம் அளிக்கும் பாதுகாப்பு அனைவருக்கும் பொதுவானது எனவும் குறிப்பிடுகின்றது. உறுப்புரை 14 ஏற்பாடுகளின் கீழ் பிரசை ஒருவர் தனியாகவும், கூட்டாகவும் தனது சமயத்தினை, நம்பிக்கையினை பின்பற்றவும், அதன் போதனைகளின் படி வணக்கங்களிலும், அனுட்டானங்களில் ஈடுபடவும் சுதந்திரம் உடையவர் எனக் குறிப்பிடுகின்றது.
இவ் அரசியலமைப்பின் ஏற்பாடுகள் குறித்துரைக்கின்ற விடயங்களில் மட்டுப்பாடுகளை மேற்கொள்வதாக இருப்பின் அது பாராளுமன்ற சட்டத்தினாலேயே மேற்கொள்ளப்பட வேண்டும். மறுபுறத்தில், அரசியலமைப்பின் உறுப்புரை 170 குறிப்பிடும் ஏற்பாடுகள் சுற்று நிருபம் என்பது நாட்டின் சட்டம் அல்ல என விபரிக்கின்றது. இதனால் இச்சுற்று நிருபமானது நாட்டின் அரசியலமைப்பு சட்டத்திற்கு முரணானது என்பதுடன் சட்ட வலிதற்றது. எனவே, புத்தசாசன திணைக்கள செயலாளரினால் வெளியிடப்பட்டுள்ள சுற்று நிருபமானது அவர் தனது நிருவாக அதிகார வரம்பெல்லைக்கு அப்பாற்பட்டு மேற்கொண்டுள்ள நடவடிக்கை ஒன்றாகும்.
வக்பு சபை சட்டம்
பள்ளிவாசல்களை பதிவு செய்தல் அவற்றின் பதிவுகளை இரத்துச் செய்தல் மேலும் பள்ளிவாசல்களின் நிதி பரிமாற்றங்களை கண்காணித்தல் முதலிய அனைத்து கருமங்களும் வக்பு சபைக்கு உரித்தான விடயங்களாகும். பள்ளிவாசல் ஒன்றினை பதிவு செய்வதில் ஏற்படுகின்ற நிகழ்வு பிழைகள் மற்றும் சட்டப் பிழைகள் குறித்து கவனம் எடுக்கவும், அவற்றை தீர்க்கவுமான அனைத்து எற்பாடுகளையும் வக்பு சட்டம் கொண்டுள்ளது. எனவே இக்கருமங்களை மேற்கொள்ளவென வக்பு சபையும், முஸ்லிம் கலாசார திணைக்களமும் நாட்டு சட்டத்தினால் தாபிக்கப்பட்டு செயற்பட்டு வருகின்ற அதிகார நிறுவனங்களாகும். அவற்றின் செயற்பாடுகளில் தலையிடுவதற்கு புத்தசாசன அமைச்சுக்கோ அல்லது அதன் செயலாளருக்கோ அதிகாரம் எதுவும் கிடையாது.
மேலும், பள்ளிவாசல்களின் நிருவாக விடயங்கள் குறித்தும், எனைய அதன் நடவடிக்கைகள் குறித்தும் ஏனைய சட்டங்களுக்கும் வக்பு சட்டத்திற்கும் இடையில் முரண்நிலை
தோன்றுமாக இருந்தால் வக்பு சட்டமே மேலோங்கும் எனவும், அத்தருணத்தில் வக்பு சட்டத்தினை கருத்திற் கொண்டே தீர்மானங்கள் மேற்கொள்ளப்பட வேண்டும் எனவும் வக்பு சட்டத்தின் பிரிவு 57ஆ குறிப்பிட்டுக் கூறுகின்றது.
புத்தசாசனம் எதனை சாதிக்க எண்ணுகிறது?
நாட்டில் பௌத்தம் மேலோங்க வேண்டும். எனவே ஏனைய வணக்கத்தலங்களில் மட்டுப்பாடுகளையும் கட்டுப்பாடுகளையும் விதிக்க வேண்டும் என்பது சிங்கள- பௌத்த அரசியலின் அடிப்படைக் கொள்கை. நாட்டில் இவ்வாறான சிங்கள- பௌத்த நடவடிக்கையினை புத்தசாசன அமைச்சு முன்னெடுப்பது வியப்புக்குரியதல்ல. ஆனால் அதனை அவர்கள் ஏன் பள்ளிவாசல்களில் மட்டும் தற்காலத்தில் முன்னெடுக்கின்றனர் என்கின்ற கேள்வி எல்லோர் மத்தியிலும் தற்போது காணப்படுகின்றது.
நாட்டில் பள்ளிவாசல்கள் போன்று ஏனைய வணக்கஸ்தலங்களை பதிவு செய்யவோ ஒழுங்கமைக்கவோ சட்டங்கள் எதுவும் கிடையாது. அவற்றை தனது சுற்று நிருபத்தின் சூழ்ச்சி வலைக்குள் சிக்க வைப்பதுவும் அதன் மூலம் நாட்டில் புத்த சாசனத்தினை நிலைபெறச் செய்யும் கனவை மெய்ப்பிப்பதும் மிகவும் சுலபமான காரியமாக புத்த சாசனவுக்கு தோன்றலாம். ஆனால் முஸ்லிம்களின் வணக்கஸ்தலமான பள்ளிவாசல்கள் தொடர்பில் நடவடிக்கை மேற்கொள்ள நாட்டில் ஏற்கனவே சட்டம் காணப்படுகிறது. இதனால் அச்சட்டங்களை நீக்குவதும் அல்லது அவற்றின் ஏற்பாடுகளை மீறி தமது திட்டங்களை முன்னெடுப்பதற்கும் அவ்வப்போது சில உபாயங்களையும், போராட்ட வழிகளையும் அரசாங்கத்தின் ஒத்துழைப்புடன் மேற்கொள்ள வேண்டிய நிலைமை சிங்கள- பௌத்த பேரினவாதத்திற்கு உண்டு. இதற்கு நியாயமான கால இடைவெளியும் தேவையாக அமையும். இதன் காரணமாகவே, தற்போது பள்ளிவாசல்கள் மீதான அடக்கு முறைகள் மேற்கொள்ளப்பட்டு வருகின்றன.
மறுபுறத்தில், தற்போது நாடு கொண்டுள்ள சர்வதேச அழுத்தத்திற்குள் ஏனைய கிறிஸ்தவ மற்றும் இந்து ஆலயங்கள் மீது இச்சுற்று நிருபத்தினை திணிக்க முற்படுவது அரசாங்கத்தின் தான்தோன்றித்தனமான சிங்கள- பௌத்த பேரினவாத நடவடிக்கையினை சர்வதேசத்திற்கு தெளிவாக படம் பிடித்து காட்டிவிடும்.
ஏனெனில் அவ்விரு சமூகங்களும் சர்வதேச தொடர்புகளில் நன்கு ஊறித் திளைத்தவை. இதனாலும் அவற்றின் வணக்கஸ்தலங்கள் மீதான அடக்குமுறை அவர்களுடைய நிகழ்ச்சித் திட்டத்தில் பிற்போடப்பட்டிருக்கலாம். ஆனால் முஸ்லிம்கள் சர்வதேச ரீதியில் நசுக்கப்பட்டு வருகின்றவர்கள், அவர்களை நசுக்குவதன் மூலமே அரசுக்கும் சர்வதேச அளவில் பாராட்டுகள் கிட்ட வாய்ப்புள்ளது. அதேவேளை நசுக்கப்படும் அல்லது அடக்கி ஒடுக்கப்படுகின்ற முஸ்லிம்களின் குரலை சர்வதேசம் எப்போதும் கணக்கில் எடுக்காது என்பதனையும் சிங்கள- பௌத்த அரசாங்கம் நன்கு விளங்கி வைத்திருக்கின்து.
முஸ்லிம்கள் என்ன செய்ய வேண்டும்?
கடந்த காலங்களில் விட்ட அதே பிழைகளையும் தவறுகளையும் முஸ்லிம் சமூகம் மீண்டும் அரங்கேற்ற முற்படக் கூடாது. மாறாக அவற்றில் இருந்து தமது போராட்டத்திற்கென படிப்பினைகளை உருவாக்கிக் கொள்ள வேண்டும். இதுவரை காலமும் பள்ளிவாசல்களில் ஏற்பட்ட பிரச்சினைகள் குறித்து மேற்கொண்ட தீர்மானங்கள் எதுவாக இருப்பினும் அவற்றால் எமது முஸ்லிம் சமூகம் பெற்றுக் கொண்டது எதுவுமில்லை. இதற்கு கடந்த காலங்களில் இனவாத அச்சுறுத்தல்களுக்கு உள்ளான 30 பள்ளிவாசல்கள் தற்போது சான்றாய் எம்முன் காணப்படுகின்றன.
நாட்டின் ஒரு கோடியிலுள்ள பள்ளிவாசலில் ஏற்படுகின்ற சிறு சிதறலையும் நாடு பூராகவும் உள்ள முஸ்லிம்
தேசத்தின் பிரச்சினையாக நாம் கருத வேண்டும். வேறுபாடுகளை விட்டு, ஜமாஅத் பிரிவினைகளை விட்டும் இந்த விடயத்திலாவது நாம் ஒன்றிணைந்து நடவடிக்கைகளை மேற்கொள்ள முன்வர வேண்டும்.
தேசத்தின் பிரச்சினையாக நாம் கருத வேண்டும். வேறுபாடுகளை விட்டு, ஜமாஅத் பிரிவினைகளை விட்டும் இந்த விடயத்திலாவது நாம் ஒன்றிணைந்து நடவடிக்கைகளை மேற்கொள்ள முன்வர வேண்டும்.
தற்காலிகமான, சுயநலம் வாய்ந்த தீர்வுகளிலும் திட்டங்களிலும் கவனம் செலுத்துவதனை விடுத்தும் நிரந்தரமானதும், முஸ்லிம் சமூகத்திற்கு என்றும் பயன்தரக்கூடியதும், எதிர்கால சந்ததிகள் எம்மை போற்றும் வகையிலான அணுகுமுறைகளையும் தீர்வுளையும் கண்டு அதனைப் பெற்றுக் கொள்ள நாம் முயற்சிக்க வேண்டும்.
சோரம்போன அரசியல் தலைமைகளை நம்பி விலைபோகின்ற நாம் இனியாவது சட்டத்தினை நம்பி அதன் வழியில் நீதியை நிலை நாட்டும் முயற்சியில் ஈடுபட உறுதிபூண வேண்டும்
கருத்துகள் இல்லை:
கருத்துரையிடுக